انا هى !!

و.ش.ع

تونس — سهام بن عبدالله

أنا هي .. اللي قطر عليا العسل مالكلام ..و في كل زمان و مكان كتبت في خصالي الأقلام .. انا اللي بغزرة ، بضحكة و بتنهيدة نعيشك تحت جناح العز أعوام ..👇

أنا هي … الزين و العين .. كلمة ، لمسة من ريشة فنان .. ..أنا الرزانة ، الشهامة و الصدر الحنين..💏♥️
أنا هي .. موجة البحر … شمعة ضواية ساعة السهر ، شميسة تنورلكك وجهك وقت المطر… 👇

أنا هي .. بنت البحار و الصحراء و الجبل ، بنت الزيتون و شواطة القمح و النخل ..انا الأصل و الفصل و همزة الوصل ، ولدت و ربيت الطفلة و الطفل ، ….👩‍👦‍👦👩‍👧👩‍👧‍👦🤱🤰

أنا هي الأم الولادة ، المرا الوسادة ، الأخت الفدلاكة ،الجدة الحنينة و الصاحبة الرصينة 👌

أنا هي الفلاحة في أرضي . اللي بعرق جبيني نحمي عرضي ، انا المعلمة في القسم ، الطبيبة المحامية والصحفية🙂
انا هي .. زين الروبة و السفساري ، فخامة التلحيفة الدياري ، وهرة الجبة ، البدعية و الخماري..انا اللي صنعت المرقوم و الزربية ، و حكت البرنوس و الشاشية ،.. و علی يديا تزهی اللبسة التقليدية…🤩👸👰

أنا هي … اللي لمستها في قهوتكم ، و نفسها في خبزتكم ، حذاقتها في عولتكم ، ريحتها في ماكلتكم أنا تاريخكم ، حضارتكم ، أصالتكم عراقتكم..👌

انا اللي دمي عليسة و الجازية الهلالية ، اللي صلبي عزيزة عثمانة و فاطمة الفهرية ، أنا اللي قاومت القهر و الظلم و الرجعية ،… أنا الدرة اللي تزين الراجل بالرجولية.. أنا اللي مهما سلسلوني و ربطولي يديا ، أحلامي ما تتفسخ و ما تطفی من عينايا …😉

أنا هي… العينين الشهلة القروية ، اليدين المخضبة بالحنة الصفاقسية ، الساقين المحرقسة بحرقوس المهدية ، هازية شارية بالدقلة التوزرية..أنا البنررتية ، الجندوبية ،الكافية ، الجربية و التطاونية اللي لافة علی تونس حرامها الجريدية .. أنا نسمة حرية ، ملايكة و حورية ، قطعة مالجنة عالأرض مصونة محضية ..
أنا هي #المرا التونسية