و.ش.ع

بقلم / رانيا رشدى فهيم

اقولك ياعم ابو شنبات الست ايه ؟

الست لما بتحب حب ” صادق ” بيتحول حبيبها لحته منها وجزء من روحها ،

بيبقى حبيبها وابنها وابوها وحياتها ، بتعيش علي انفاسه ووجوده

وبتدمر وتتعب في بعده عنها ، بتفرح وتحس انها طايره في السما لما يفرحها وبتكره الحياه والعالم لما يزعلها او يزعل منها ..

الست لما تحب حب صادق ممكن تعمل اي حاجه وكل حاجه عشان خاطر حبها وعشان خاطر الشخص اللي بتحبه ..

 ممكن تضحي بعمرها وسعادتها وحياتها وكل حاجه في سبيل ان حبيبها يكون مرتاح وسعيد  بس لما تحس ان مهما عملت مش بتتقدر ومهما اتوجعت مش بيتحس بيها ولا بمشاعرها ، ومهما اتهددت مش بتتمد ايده تطبطب عليها ..

لما تحس ان حتى فى لحظات احتياجها بتتساب وكأنها شىء مالوش اي قيمه فى الحياه ..

لما تقول لحبيبها او زوجها او ابو ولادها  كل اللي بيضايقها وتلاقيه مكمل وبيعمله عادي واكتر من الاول كأنها ماتكلمتش ولا قالت ولا اتضايقت ..

لما تطلب منه مره و اتنين وعشره يهتم بيها وبمشاعرها ويحس بيها ويحتويها وينفض لكلامها ويستهون بإحساسها ومايحاولش حتي مجرد محاوله انه يرضيها ..

لما تحتاج حضنه ومتلاقيهوش ، لما تحتاج كلمه حلوه تطمنها ومتسمعهاش ،

لما تحتاج يطمنها ويحسسها بالآمان ومايهتمش .. بتحس انها بتموت بالبطىء ، بتعيش جسد من غير روح ومن غير حياة وبيتحول كل الحب اللي جواها لوجع ، وكتر الوجع بيتحول لقسوه .. مش قسوه علي حبيبها وبس ، دي قسوه عليه وعلي نفسه

 وعلي قلبها وعلى الدنيا كلها ..

خليك متأكد ان مهما كان مقدار حبها ليك فوجعها وقسوتك عليها ، واللا مبالاه وقت زعلها واهمالها وهي محتاجه ليك هما مقبرة الحب والطريق لنهاية كل حاجه حلوه وخسارتها للابد

عرفت ايه الرجل ماذا تعنى اشياء بسيطه تسعد زوجتك ام ولادك

او حبيبتك التى سوف تكون سندك وشريكتك بالحياه

عزيزى الرجل ….مفاتيح بسيطه جدا تجعلك تملك قلب امراه ملكه متوجه على عرش حياتك